A Cabalgata dos Reis Magos percorrerá Neda o martes dende as 10 horas ata as 18 h

 Unhas horas antes de iniciar a súa viaxe por todos os fogares do mundo para deixar os agasallos, os Reis Magos visitarán Neda o martes, 5 de xaneiro, para realizar un percorrido polo municipio e saudar así aos nenos e nenas. A pesares da nova normalidade, a cabalgata regresará a Neda, pero adaptándose ás novas circunstancias e realizando un itinerario moito máis amplo para evitar aglomeracións.

Así, as súas Maxestades de Oriente iniciarán o percorrido ás 10 horas nunha comitiva que acompañarán os vehículos de Policía Local e Protección Civil para anunciar, coas súas luces e sereas, o seu paso. Prolongarase ata as 12,30 horas e, tras un breve descanso, retomarase ás 15 horas, ata as 18 horas.

O Concello facilitará o itinerario exacto a través da páxina web municipal e máis as redes sociais, cos horarios aproximados. A intención é chegar ao maior número de fogares, aínda que polas dimensións das carrozas non é posible cubrir o 100% do territorio, cuestión pola que o Concello pide comprensión e desculpas de antemán.
 
POR VIDEOCONFERENCIA
Un día antes, o luns 4 de xaneiro, os Reis Magos manterán un encontro virtual cos nenos e nenas de Neda a través de videoconferencia. O Concello activaba esta posibilidade e abría un prazo de inscrición para que os rapaces e rapazas interesados puidesen sumarse á iniciativa e facerlles chegar as súas peticións.