Novas


Concello de Neda e Asociación de Ex Alcohólicos de Ferrolterra organizan o obradoiro gratuíto “Xestiona as túas emocións”

 No marco da relación de colaboración, Concello de Neda e Asociación de Ex Alcohólicos de Ferrolterra organizarán o obradoiro gratuito “Xestiona as túas emocións”. O taller inclúese no programa de prevención de recaídas e vai dirixido a pacientes a tratamento na Unidade de Condutas Adictivas. Celebrarase o vindeiro 18 de novembro ás 11 horas na Casa das Palmeiras, baixo a dirección da psicóloga da unidade da entidade, Ana María Caaveiro.

Dada a situación sanitaria derivada da covid-19, as prazas están limitadas a 5, e as persoas interesadas en tomar parte deben inscribirse previamente, a partir de mañá martes 27 de outubro, na Asociación de Ex Alcohólicos ou no teléfono 981 35 13 95.

O obradoiro centrarase en coñecer as emocións, identificalas e expresalas. Algo necesario para adaptarse ao entorno que nos rodea e así poder atopar o equilibrio persoal necesario na rehabilitación dunha persoa adicta. 


Neda convida á cidadanía a compartir fotos das súas cabazas e fachadas decoradas polo Samaín

 Neda prepárase para vivir o Samaín, aínda que para evitar a expansión da covid-19, farao dun modo diferente. Na súa aposta por manter o espírito da festa, o Concello avoga por trasladar a celebración ás redes sociais municipais, que compartirán as imaxes das cabazas e fachadas máis terroríficas e orixinais decoradas polos veciños e veciñas. Entre os participantes sorteará numerosos agasallos.

Así, o Concello activará dúas iniciativas, a través das redes sociais municipais, para manter, a pesar da pandemia, as tradicións ligadas ao Samaín que, nas últimas décadas, fóronse recuperando na comarca e no conxunto de Galicia. Trátase de “Que lle vas facer á túa cabaza?” e “En Samaín, muda a fachada de túa casa”.

Así, anima aos veciños e veciñas a poñerse ao choio, e tallar, pintar ou decorar as típicas cabaceiras, e a enviar, entre o 24 de outubro e o 2 de novembro, unha imaxe das creacións e da persoa autora, xunto ao nome e apelidos, DNI e enderezo, ao número 650484521 ou a través do correo electrónico cultura@neda.gal, para a súa difusión nas páxinas oficiais de Facebook, Instagram ou Twitter.
 
Co ánimo de incentivar a participación, entre as persoas que fagan chegar as súas fotos sortearanse tres lotes de contos (público infantil) e tres ebooks Kindle con luz frontal entre os adultos (maiores de 12 anos).
 
En paralelo, os nedenses tamén poderán sumarse á celebración do Samaín adornando con motivos alusivos a esta festa as fachadas das súas vivendas, axudando así a crear ambiente. Esta iniciativa, de idéntica dinámica á das cabazas (envío de foto polos mesmos medios), está orientada exclusivamente a maiores de idade. E entre os autores dos traballos, o Concello sorteará outros tres ebooks.
 
Todas as persoas que decidan participar terán que entregar debidamente cuberta, ben por correo electrónico ou de forma presencial na Casa da Cultura, a autorización de uso das imaxes e datos por parte do Concello. Un documento que se pode descargar na web municipal ou recoller na Casa da Cultura. 


O Concello de Neda mostra o seu apoio á marcha reivindicativa das confrarías da ría

 O Concello de Neda respalda as reivindicacións das confrarías da ría e súmase á protesta que realizarán este xoves os mariscadores e as mariscadoras desplegando unha pancarta de apoio na fachada da casa consistorial. Por ela pasarán mañá os vehículos que participarán na marcha reivindicativa e que está previsto se inicie na ensenada da Malata ás 13 horas. Unha mobilización convocada pola ausencia de resposta por parte da Consellería do Mar ás reivindicacións do sector na búsqueda dunha solución urxente e efectiva para a situación da ría e a grave crise que atravesa o sector.



O secretario municipal de Neda entrega ao presidente do TSXG a publicación coa investigación que o fixo merecedor do XXI premio Manuel Colmeiro

 O secretario municipal do Concello de Neda e Doutor en Dereito, Alejandro Antelo Martínez, vén de facer entrega ao presidente do Tribunal Superior de Xustiza de Galicia, José María Gómez y Díaz-Castroverde, da publicación que recolle o seu traballo de investigación sobre as verbenas populares en Galicia e que o fixo merecedor do XXI premio Manuel Colmeiro, para estudos de investigación sobre o sector público galego.

O presidente do máximo órgano do Poder Xudicial en Galicia, que á súa vez presidiu o xurado que outorgou o galardón, recibiu un exemplar da publicación deste traballo, que versa sobre a intervención dos concellos nas festas populares da nosa comunidade, tras a aprobación da Lei de Espectáculos Públicos e Actividades de Galicia, vixente desde o mes de decembro do ano 2018.

Tal e como no seu momento se subliñou, a análise de Antelo Martínez, titulada “Las verbenas populares en Galicia: régimen de intervención municipal”, supón unha extraordinaria achega a un sector cunha significativa importancia social e económica en Galicia, e aporta ideas e avances concretos dos que pode beneficiarse o conxunto da sociedade galega.


A Casa da Cultura acollerá este venres o espectáculo Fillos do Sol, escrito e dirixido por Cándido Pazó sobre a figura de Pondal

 O salón de actos da Casa da Cultura de Neda acollerá este venres 23 o espectáculo Fillos do Sol, escrito e dirixido por Cándido Pazó. Unha homenaxe ao controvertido escritor que, con Rosalía e Curros, constituíu un dos tres pés poéticos do Rexurdimento galego. A función dará comezo ás 20,30 horas con entrada de balde pero con reserva previa de butaca chamando ao 981 39 02 33 a partir deste mércores 21 de outubro e ata o mesmo venres ás 14 horas (ou ata esgotar prazas). O espectáculo chegará a Neda da man da Rede de Dinamización Lingüística da Xunta de Galicia.

Con César Cambeiro, Adrián Ríos e Alba Bermúdez, 75 minutos de emotivo, reflexivo e divertido espectáculo. Coas súas dúas tramas entrelazadas, a obra combina momentos de reflexión, de diversión e de comicidade, de emoción, de reivindicación, de tenrura, de controversia…

Unha elucubración sobre a figura de Eduardo Pondal e a súa obsesión co monumental poema épico que ocupou toda a súa vida como escritor: Os Eoas. A cabalo entre a realidade ficcionada e a fabulación dramática, don Eduardo, xa octoxenario e comesto pola neurose dos seus últimos anos, confronta as súas dúbidas, medos e insatisfaccións creativas cun personaxe nacido da súa perturbación: Eduardo, el mesmo cando comezaba, de mozo, a súa carreira literaria. E, como contrapunto, a vida real e diaria representada por Rosa, a xove criada da pensión na que o bardo pasou a última tempada da súa vida.

<<  Anterior | 1  | 2  | 3  | 4  | 5  | Seguinte  >> 



Axenda


Feirón Mensual

 Durante toda a mañá, nas inmediacións da Casa das Palmeiras, con produtos da horta


Pleno extraordinario

 Ás 10 horas, cun punto na orde do día: sorteo das mesas electorais para as eleccións ao Parlamento de Galicia


Representación de la obra teatral "Chola, a it girl"

 Na Casa da Cultura, ás 20,30 horas. Comedia dirixida a un público maior de 11 anos, con entradas a 2 euros

<<  Previous  | 1  | 2  | 3  | 4  | 5  | Next  >> 

Tramites online