Novas


O Concello reanuda os prazos de matriculación na Escola Infantil Municipal Os Pelegríns

 En aplicación do Real Decreto 537/2020 do 22 de maio, o Concello de Neda informa de que, a partir do vindeiro luns 1 de xuño, reanudaranse os prazos de matriculación na Escola Infantil Municipal Os Pelegríns.

Deste xeito, as familias con nenos/as matriculados/as no presente curso no centro poderán formalizala do 1 ao 16 de xuño e os nenos/as de novo ingreso, do 17 de xuño ao 16 de xullo. Iso si, sen perxuízo da posibilidade de matricularse durante o resto do ano en tanto en canto non se cubran todas as prazas dispoñibles.

Así mesmo, os trámites deben realizarse na casa consistorial ou vía telemática. O modelo de solicitude de praza, así como o impreso para acollerse á liña de subvencións municipais para axudar a costear o servizo pode descargarse da web municipal (debe achegarse DNI, libro de familia e certificado de empadronamento e, no caso de optar ás axudas, copia da última declaración da renda da persoa solicitante).
 
A Escola Infantil Municipal Os Pelegríns conta con 41 prazas para nenas e nenos de 0 a 3 anos. Situada na zona do Empedrón, dispón de 3 aulas -de 0 a 1 ano, de 1 a 2 anos e de 2 a 3 anos-, zona de comedor, aseos e espazos de xogo. Coa súa posta en marcha o Concello de Neda facilitaba un servizo de conciliación da vida laboral e o coidado dos/as fillos/as para as familias do municipio, ao tempo que busca atraer e fixar poboación no municipio.


Reapertura da Aula de Informática

 A partir do vindeiro luns, 1 de xuño, o Concello de #Neda procederá á reapertura da Aula de Informática sita na Casa da Cultura con tres ordeadores ao servizo dos e das usuarias e a posibilidade de uso dun ordeador da Biblioteca Municipal. De luns a venres, o horario será de 10 a 14 horas. Será obrigatorio o uso de mascarilla. Os teclados estarán protexidos cun film e os equipos, cadeiras e mesas desinfectaranse tras cada uso. Non é preciso cita previa e o tempo máximo por persoa será de 60 minutos



Minuto de silencio polas víctimas do COVID-19

 Traballadores/as municipais, concelleiros/as e veciños/as de Neda gardaron esta mañá ás 12 horas un minuto de silencio ás portas da casa consistorial en sinal de duelo polos falecidos como consecuencia da pandemia do COVID-19. Así mesmo, e seguindo o real decreto aprobado onte polo Consello de Ministros polo que se declara loito oficial, as bandeiras ondearán a media hasta dende hoxe e ata o 6 de xuño.



O Concello contratará 6 albaneis con cargo ao PEL-Concellos da Deputación provincial

 O Concello de Neda contratará 6 albaneis a tempo parcial ao abeiro do programa PEL-Concellos que promove a Deputación provincial da Coruña. Será unha contratación laboral temporal, por un periodo de 5 meses e, coa publicación hoxe do anuncio no Boletín Oficial da Provincia ábrese o proceso selectivo. A partir de mañá xoves 28 de maio, e por espazo de 5 días naturais, as persoas interesadas en optar a unha das prazas poderán presentar a súa solicitude -preferentemente vía telemática-.

Tanto as bases da convocatoria como o modelo de solicitude de admisión no proceso selectivo pode consultarse na web municipal www.neda.es ou nas oficinas xerais. 



Rematan as obras de pavimentación dos camiños en Puntal de Abaixo que conectan Neda e Fene e o paralelo á vía do ferrocarril

 O Concello de Neda informou esta mañá do remate das obras de acondicionamento de dous camiños en Puntal de Abaixo. Trátase do camiño que discorre paralelo á vía do ferrocarril e máis o de conexión co municipio de Fene. Nunha e noutra intervención a Administración local investiu 27.692,73 euros, que financiou con cargo ao POS+Adicional.

O intenso tráfico que ambos camiños soportan levou ao Concello a planificar as actuacións, que requeriron de autorizacións previas por parte de ADIF, que tamén supervisou os traballos, Demarcación de Costas e Augas de Galicia.

As obras contemplaron a pavimentación dos viais, mellorando así a mobilidade na zona e o acceso aos núcleos de poboación próximos.

<<  Anterior | 1  | 2  | 3  | 4  | 5  | Seguinte  >>