Novas


NEDA CONVOCA O CONCURSO DE CARTEIS PARA PROMOCIONAR A SÚA AFAMADA FESTA DO PAN

Neda, 23 de maio de 2019.- O Concello de Neda convoca o certame de carteis anunciadores da XXXI Festa do Pan, unha celebración que este ano será o día 1 de setembro e que representa a principal cita festiva do calendario local.
Promocionar a xuntanza e fomentar a creación artística entre a poboación están entre os obxectivos unha iniciativa aberta a todas as persoas interesadas, xa sexa de maneira individual ou en equipo. A organización establece un único premio por importe de 200 euros. Os interesados teñen de prazo ata o día 18 de xuño para presentar ou enviar, vía correo postal, os seus traballos ao Concello (avenida Algeciras, nº 34, 15510, Neda). Só serán admitidos os que entren dentro de prazo.
Todos os carteis deberán presentarse en soporte dixital e en todos eles terán que figurar o escudo do Concello de Neda, así como a imaxe corporativa da Deputación da Coruña, Xunta de Galicia, Axencia de Turismo de Galicia, Pan de Neda e Abanca.
O formato (PDF, JPG ou similar) deberá axustarse ademais para que poida ser reproducido en vertical e cun tamaño A3, mentres que queda á decisión dos concursantes tanto a concepción da obra como a técnica a empregar. No soporte dixital presentado terá que figurar o ficheiro co nome do lema que servirá para preservar a identidade do autor ou autora ata o fallo do xurado. Todo concursante terá a posibilidade de presentar un máximo de dous traballos, aínda cun lema diferente cada un deles.
Dulce María López Fernández (Fene), coa obra “Aura Nedense”, e Alba Permuy Martínez (Neda), coa denominada “Pan Queer de Neda”, foron as gañadoras das edicións 2018 e 2017, respectivamente.
O goberno de Neda anima á participación de novos creativos e deseñadores gráficos nunha convocatoria que invita á orixinalidade e contribúe a divulgar a imaxe máis actual do municipio.



A ASOCIACIÓN SOCIOCULTURAL ASCM REPRESENTARÁ A OBRA “A MARABILLA DO DIVERSO” NA CASA DA CULTURA

Neda, 23 de maio de 2019.- O teatro volverá este sábado (día 25) á Casa da Cultura de Neda da man da Asociación Sociocultural ASCM, que representa a obra “A marabilla do diverso”.
A actuación dará comezo ás 20.00 horas e a asistencia ten carácter gratuíto. “A marabilla do diverso” versa sobre a liña que divide a discapacidade da capacidade. Fala de como as persoas con discapacidades queren ter unha vida normal e ser tratados con respecto. Queren ter casa, comida, traballos, amigos e parellas como todo o mundo. Fala tamén de relacións paternofiliais e de amizade e amor. Eugenia Sanmartín é a autora dunha peza coa que se quere facer un retrato do cotiá e transmitir ao público a marabilla do diverso.



A IV FEIRA DO CAMIÑO DE NEDA SERÁ A PRIMEIRA FIN DE SEMANA DE XUÑO

Neda, 22 de maio de 2019.- O Concello de Neda organiza para a primeira fin de semana de xuño (días 1 e 2) a IV Feira no Camiño, unha iniciativa coa que se persegue fomentar a participación cidadá e dinamizar o municipio desde o punto de vista social pero tamén económico.
A rúa Real volverá a acoller unha cita aberta á participación gratuíta de comerciantes de alimentación, artesanía e produtos en sistema de re-venta (segunda man). O horario de apertura da feira será de 11.00 a 15.00 e de 17.00 a 22.00 horas. As persoas que poidan estar interesadas en participar teñen de prazo ata este sábado, 25 de maio, para inscribirse a través do correo electrónico do departamento de Cultura (cultura@ neda.es).
O modelo oficial de solicitude xa está accesible na páxina oficial do Concello (www.neda.es) e mesmo nas dependencias municipais. En caso de dúbida o para aqueles interesados que non teñan medios informáticos tamén cabe a posibilidade de entregar persoalmente o escrito na Casa da Cultura de Neda. A organización advirte de que non se admitirán peticións presentadas fóra de prazo ou realizadas de forma diferente á oficial.
Ademais da instancia, os interesados deben achegar a seguinte documentación: ficha de participación, fotocopia do DNI, fotografía recente do posto de venda así como dos produtos a comercializar e unha declaración asinada conforme o titular da solicitude ten realizado o pagamento do Seguro de Responsabilidade Civil. No caso dos postos de alimentación ademais haberá que acreditar que a persoa que estará ao frente do posto é apta para a manipulación de alimentos. A localización e distribución dos postos será competencia exclusiva da organización que ademais asume a contratación do servizo para a vixilancia do recinto, a difusión do evento e a decoración e ambientación da feira mediante a contratación de diferentes actividades.
Pola súa banda, os comerciantes estarán obrigados a manter o espazo limpo, a levar as mesas e soportes necesarios para expor a súa mercancía, a facer uso de lámpadas de baixo consumo e a comezar a montar os postos no antes da tarde do venres 31 de maio ou a partir das oito da mañá do mesmo sábado día 1 de xuño.


O CONCELLO DE NEDA CONVOCA PARA O DÍA 2 DE XUÑO O II CERTAME DE PINTURA RÁPIDA Ó AIRE LIBRE

Neda, 21 de maio de 2019.- O Concello de Neda organiza para o día 2 de xuño a segunda edición do certame de Pintura Rápida ó Aire Libre, unha actividade que o ano pasado reuniu a 37 participantes. O obxectivo é a dar a coñecer o municipio e mesmo promocionar a cultura a través dunha das creacións artísticas máis versátiles. As persoas interesadas pueden incribirse a través do correo electrónico cultura@neda.es ou
ben o mesmo día do certame, entre as 9.00 e 11.00 horas na Casa das Palmeiras (avenida Algeciras, nº 47).
A organización establece un total de tres premios e unha categoría especial para incentivar a participación da poboación local. Os participantes de Neda deberán acreditar a súa vinculación co municipio mediante xustificante do padrón ou documento de pago de calquera tipo de imposto ou taxa. A contía dos premios oscila entre os 1.000 e os 200 euros. Os gañadores tamén recibirán diplomas. Os premios estarán suxeitos ás retencións fiscais correspondentes.
O estilo e a temática serán libres e a participación vai dirixida a persoas maiores de idade de calquera nacionalidade. A idea é capturar a paisaxe, as xentes ou os costumes da localidade nunha obra pictórica a realizar “in situ” e a executar nunha área delimitada pola organización.
Cada participante deberá achegar o seu propio material -incluído o cabalete-, realizar a obra sobre un soporte ríxido e axustar o tamaño da mesma ás medidas establecidas pola organización, que van dos 50x50 centímetros que pode ter a máis pequena ata os 100 x81 da máis grande.
Os concursantes disporán dun total de seis horas para realizar unha obra de estilo e técnica libre. As pinturas entregaranse na Casa das Palmeiras, a partir das cinco da tarde, e só unha hora despois, ás seis, darase a coñecer o nome do gañador. Unha vez entregados os premios, os autores dos cadros non premiados poderán asinar as obras realizadas e poñelas á venda ata as oito da tarde.
As obras premiadas pasarán a ser propiedade do Concello de Neda ou das persoas ou entidades que patrocinen o certame, o mesmo que os dereitos de reprodución. Raúl Gil Burés, Dauga Jean Jacques e José Ignacio Amelivía García foron os gañadores da primeira edición do certame e as súas obras xa están a decorar as paredes da Casa do Concello.



BASES FEIRA NO CAMIÑO 2019


<<  Anterior | 1  | 2  | 3  | 4  | 5  | Seguinte  >>