Novas


Pakolas e Laura Romero traen a Neda este domingo o seu espectáculo Ti debuxas, eu c@nto

 O salón de actos da Casa da Cultura de Neda acollerá este domingo 18 de outubro ás 12,30 horas o espectáculo “Ti debuxas, eu c@nto”, a cargo de Pakolas e coa colaboración de Laura Romero. Unha función dirixida especialmente ao público máis novo da casa con música, contos e ilustracións. Incluída no programa Ler Conta Moito da Rede de Bibliotecas da Xunta de Galicia, a entrada é de balde pero con inscrición previa.

Así, as persoas interesadas en participar poden anotarse dende mañá martes e ata o venres na Casa da Cultura ou no teléfono 981 39 02 33, en horario de 9 a 13 e de 16 a 20 horas.

A función desenvolverase baixo un estrito protocolo de prevención fronte á covid-19 e as prazas son limitadas.


O Concello adxudica o servizo de atención na Biblioteca e Arquivo por 21.507,20 euros anuais

 Á espera de poder convocar a praza, o Concello de Neda vén de asinar o novo contrato para a xestión auxiliar do servizo de biblioteca e arquivo documental. Un servizo que prestará a empresa Eulen, Centro Especial de Emprego, por espazo dun ano.

Conclúe así o concurso aberto pola Administración local para dar cobertura a este servizo na Biblioteca Municipal. Investirá nel 21.507,20 euros ao ano, e o contrato establece unha duración do mesmo dun ano con posibilidade de dúas prórrogas, ata completar no seu conxunto o trienio.

Unha medida necesaria para a prestación do servizo que o Concello ten intención de cubrir no futuro coa convocatoria da praza, unha vez que o Goberno central levante as limitacións á reposición de persoal.


O Concello adxudica o contrato do servizo de reparación e mantemento das instalacións do alumeado público por 23.232 euros ao ano

 O Concello de Neda vén de adxudicar a Proymel Montajes SL o contrato do servizo de reparación e mantemento das instalacións do alumeado público e semafórico da localidade. Un contrato por un ano con posibilidade de dúas prórrogas coas que se completaría o trienio, e no que o Concello investirá nese periodo preto de 70.000 euros (a razón de 23.232 euros ao ano).

Este contrato, que se licitaba mediante concurso público, comprende a prestación dos servizos de reparación e mantemento das instalacións do alumeado público e semafórico -contabilízanse un total de 1.777 puntos de luz en todo o termo municipal-, e actuacións especiais en eventos de carácter festivo. Tamén se inclúe o mantemento do alumeado dos edificios de titularidade municipal -uns 30- e instalacións do campo de fútbol de San Isidro.

Así mesmo, nos últimos anos substituíronse unha importante parte das lámpadas de descarga do alumeado público por lámpadas LED, que comportan unha notable redución do consumo. Como consecuencia disto, prodúcese unha significativa redución do termo de potencia precisa para as devanditas instalacións, redución que haberá de ser tramitada co subministrador da enerxía eléctrica. Por iso, o Concello establece que, ao remate do contrato -un ano-, a totalidade dos subministros teña o seu termo de potencia contratado axustado ao requirimento efectivo de cada instalación.


Concello e hostalería entregan as cestas do certame “En Neda, os Bares teñen premio”

 Concello e hostaleiros fixeron entrega das dúas cestas que se sortearon no marco do certame “En Neda, os Bares teñen premio”. Un certame organizado conxuntamente entre Administración local e sector, que se celebrou entre os meses de agosto e setembro para premiar a fidelidade da clientela. Así, a Casa das Palmeiras acollía o acto onte á tardiña.

Rubén Soler Gundín recollía a primeira das cestas de mans da concelleira de Turismo, Soraya Fernández, e do representante do Bar Jupe, Daniel Pernas. O alcalde, Ángel Alvariño, e Jorge Basoa, en representación de La Flor de Mayo, entregaban a segunda a José González González.

Concello e hostaleiros valoraron moi positivamente o proxecto, no que se entregaron máis de 9.000 tickets entre os clientes que acudiron aos establecementos adheridos os xoves dos últimos dous meses. Unha valoración que levou ao sector a avanzar que reeditarán o certamen antes de rematar o ano, coa intención de sumar máis locais á iniciativa e continuar con accións que den novas razóns para achegarse aos bares e cafeterías de Neda.  
 
Na campaña participaron Harina y Brasa, Bar Jupe, Bar Valencia, Cervecería O Lagar, Mesón O’Fumazo, Cantina do polideportivo do Roxal, Café bar Albarón e La Flor de Mayo.


Xuntanza de traballo entre Concello e tecido asociativo sobre a liña de axudas para investimentos e promoción de actividades culturais e deportivas

 O alcalde de Neda, Ángel Alvariño, acompañado de concelleiros e concelleiras do equipo de goberno mantivo no día de onte unha xuntanza de traballo con representantes do tecido asociativo do municipio. Ademais de recoller as súas suxestións e demandas, o tema central do encontro, celebrado na Casa da Cultura, foi a recente convocatoria da liña de axudas municipais para investimentos e promoción de actividades deportivas e culturais. Unhas subvencións que as entidades e asociacións teñen de prazo para solicitar ata o vindeiro día 20 e que contan cun orzamento de 17.000 euros.

Para facilitar a tramitación, as asociacións interesadas poden descargar os impresos de solicitude da web municipal, nos seguintes enlaces:

Para subvencións en materia deportiva:
 
Para subvencións en materia cultural:
 
Impresos que deberán presentar no rexistro municipal da casa consistorial.
 
Na reunión, remarcouse o feito de que este ano, por primeira vez, ademáis de financiar actividades, as axudas pódense destinar a investimentos. Unha posibilidade planteada en reunións previas entre Concello e entidades para tentar facilitar o acceso ás axudas no contexto actual derivado da covid-19, e que obrigou ao aprazamento ou suspensión dun bo número de actividades.
 
As bases da convocatoria poden consultarse no seguinte enlace: https://bop.dacoruna.gal/bopportal/publicado/2020/09/30/2020_0000006728.pdf

<<  Anterior  | 5  | 6  | 7  | 8  | 9  | Seguinte  >>