Novas


O Concello de Neda aproba uns orzamentos para o 2021 eminentemente sociais adaptados ao contexto covid-19

O Concello de Neda aprobou onte os orzamentos para 2021. Unhas contas marcadas pola pandemia coas que a Administración local busca especialmente responder ás necesidades en materia social, minimizando o impacto socioeconómico derivado da covid-19. Segundo explicou o alcalde, Angel Alvariño, ascenden a 4.801.736,38 euros, co que gastos e ingresos se incrementan nun 2,28% respecto aos últimos orzamentos, aprobados en 2018. Na sesión plenaria extraordinaria, as contas saíron adiante cos votos do grupo de goberno.

O rexidor destacou a importancia de dar luz verde aos orzamentos para adaptalos ao novo contexto, blindando o gasto social e reforzándoo con partidas procedentes doutras áreas como cultura ou deportes nas que a actividade mermou polas restricións impostas.

Así, neste contexto, o Concello prioriza máis que nunca a atención á dependencia e a cobertura das necesidades básicas dos colectivos máis vulnerables durante a crise da covid-19 (persoas maiores, dependentes, en situación de desemprego…). Na práctica, veranse ampliadas as partidas destinadas a emerxencia social (adquisición de alimentos, axudas para cubrir cuotas de hipotecas, recibos de aluguer, luz, compra de EPIS e menciñas…); os fondos para cubrir a exención de tributos e taxas coas que aliviar a súa presión fiscal, e os recursos económicos para prestar o servizo de axuda no fogar (Neda é o concello da provincia da Coruña de menos de 20.000 habitantes que máis esforzo inversor realiza neste sentido). Manteranse tamén as axudas á natalidade como o cheque 300 ou as subvencións para o acceso á escola infantil municipal (neste exercicio licitarase de novo o contrato de xestión e, en base ao estudo económico que se está a elaborar, determinaranse os fondos necesarios).
 
As contas tamén contemplan as subvencións ao estudo, incluído o ciclo de Infantil, e as axudas para a posta en marcha dos servizos de comedores escolares e programas madruga nos centros educativos de Neda. Ademais, os orzamentos dan continuidade ás subvencións a entidades sen ánimo de lucro, que desplegan unha labor máis necesaria que nunca na nosa comarca como a Cociña Económica, Cruz Vermella, Albergue Pardo de Atín…
 
Para facilitar ás asociacións do Concello o acceso ás axudas municipais, por segundo ano consecutivo poderán incluir investimentos a maiores de actividades e, por primeira vez, inclúese unha partida específica para a concesión de subvencións a deportistas individuais.
 
As contas contemplan tamén as previsións de gasto derivadas das modificacións propostas na Relación de Postos de Traballo e futuras contratacións, como o reforzo do departamento municipal de Servizos Sociais cun/ha traballador/a social a media xornada.
 
SEN PRÉSTAMOS
Neste exercicio, igual que sucedera no ano anterior, xa non é necesario dotar cantidade algunha para facer fronte ó pago de xuros e amortización de capital ao quedar totalmente cancelado no ano 2019 o único préstamo vixente ata entón cunha entidade financeira. Así mesmo, tendo en conta que a Deputación Provincial aínda non fixou o calendario de devolución dos préstamos PAI aos que este Concello acudiu en anos anteriores, a Administración local disporá de tales créditos para outras finalidades máis acordes para dar resposta ao contexto actual de incertidume e crise económica e social que pode darse nos vindeiros meses.


O Concello inicia as obras de acondicionamento do camiño de Puntal de Abaixo

O Concello de Neda iniciaba esta semana as obras de acondicionamento do camiño de Puntal de Abaixo. Unha intervención na que a  Administración local está a investir 24.656,71 euros con cargo ao Plan provincial de cooperación ás obras e servizos de competencia municipal (Plan único de concellos) “POS+ 2020”-Achega provincial 2020-.
 
A actuación contempla o aglomerado do vial para dar resposta ao avanzado estado de deterioro do firme do camiño, dando unha solución permanente no tempo e reducindo os gastos  de mantemento, ao tempo que se mellora o servizo de acceso ás entidades de poboación e a seguridade vial.


O Concello de Neda conmemora o Día da Poesía coa proxección do documental Vértice de Versos e o coloquio posterior co seu director

 O Concello de Neda conmemorará o Día da Poesía o venres 26 de marzo coa proxección do documental Vértice de Versos, o coloquio co seu director, Carlos Lorenzo, e a actuación de Xoán Curiel, autor da banda sonora. Incluída na Rede Cultural da Deputación, a cita celebrarase na Casa da Cultura, a partir das 19,30 horas, con inscrición previa a partir do luns 22 de marzo no teléfono 981 39 02 33 e en horario de 10 a 14 e de 16 a 20 horas.

Vértice de Versos é unha longametraxe documental na que se repasa o acontecido desde os anos 90 no universo poético de Galicia, un proxecto audiovisual que presta atención ao valor didáctico que permite coñecer a principal fonte literaria galega. Así mesmo, marca un antes e un despois, xa que por primeira vez un documental se adentra na poesía galega, descubrindo a súa historia, contando a revolución literaria dos 90 e coñecendo como están sendo as novas formas de expresión poética.

Así, ao longo dos minutos, críticos, editores e o propio colectivo de escritores e escritoras explican o que pasou nos últimos 25 anos neste vértice xeográfico, porque coñecer de preto a poetas como Yolanda Castaño, Baldo Ramos, Emma Pedreira ou Gonzalo Hermo axuda a comprender esta situación.


ACTUALIZACIÓN MEDIDAS RESTRICTIVAS FRONTE Á COVID-19 EN NEDA

 A expensas da súa publicación no Diario Oficial de Galicia, a Xunta anunciou esta mañá o pase de Neda ao nivel alto de incidencia, o que supón un freo no proceso de desescalada e novas limitacións a partir deste venres, 19 de marzo.

 
Aínda así, a mobilidade mantense entre os concellos galegos, coa excepción daqueles en máxima incidencia -pechados perimetralmente-. Deste xeito, dende Neda poderemos desprazarnos ao resto de municipios de Galicia coa excepción de Vilardevós, Paradela e Maside.
 
Respecto á hostalería, bares, restaurantes e cafeterías tan só poderán servir en terraza, cun aforo limitado ao 50%. Iso si, o horario de peche ampliarase ata as 21 horas.
 
Como norma xeral en toda a Comunidade, as reunións de persoas non conviventes quedan prohibidas en domicilios particulares e o toque de queda mantense a partir das 22 horas e ata as 6 horas
 
Dende o Concello de Neda, queremos facer unha chamada á responsabilidade individual e colectiva no cumprimento das normas para, entre todos, evitar pasos atrás e avanzar na desescalada


O Concello dá a benvida aos novos bebés empadroados en Neda co Cheque 300

 O Concello de Neda dá a benvida aos seus novos veciños e veciñas co Cheque 300. Lembra que se trata dunha axuda á natalidade dirixida aos pais e nais que inscriban no padrón municipal aos seus bebés, fillos adoptivos ou en acollida, e contempla o pago de 300 euros para axudar nos múltiples gastos derivados da crianza. Debe formalizarse no prazo máximo de 3 meses tras a alta censal e os proxenitores deben adquirir o compromiso de residir un mínimo de 4 anos a partir desta data. Así mesmo, esa cuantía de 300 euros elévase ata os 600 no caso de menores con discapacidade.

Esta medida leva vixente varios exercicios e, anualmente, o Concello reserva unha partida de 7.500 euros nos orzamentos para sufragar a liña de axudas, ampliable. Con ela, búscase apoiar a natalidade e gañar veciños e veciñas para o municipio.

Así mesmo, compleméntase con outras como as becas destinadas a axudar a sufragar o custe mensual da Escola Municipal Infantil Os Pelegríns, un servizo clave para a conciliación da vida laboral e o coidado dos fillos de 0 a 3 anos para as familias, cuxo prazo de matriculación abrirase no mes de abril.

<<  Anterior  | 3  | 4  | 5  | 6  | 7  | Seguinte  >>