Novas


Escolas deportivas e culturai

Xa está aberto o prazo para inscribirse nas actividades.
Durante o mes de Setembro temos xornadas de portas abertas nas que se pode visitar as instalacións e participar gratuitamente nas actividades.



O MINISTERIO OTORGA AO CONCELLO DE NEDA A CONCESIÓN DE USO POR TRINTA ANOS DOS CASE 14.000 M2 DOS SUBARREIROS

Neda, 5 de setembro de 2017. O Ministerio de Agricultura y Pesca, Alimentación y Medio Ambiente vén de outorgar ao Concello de Neda a concesión de ocupación por trinta anos de 13.891 metros cadrados de dominio público marítimo-terrestre na zona dos Subarreiros. Son os espazos sobre os que o goberno municipal proxecta a construción dunha pista polideportiva, un parque biosaudable e a ampliación do parque infantil xa existente. Esta decisión ampara así mesmo a concesión pola que o Ministerio, no ano 2001, autorizou á construción en 1.000 m2 da piscina descuberta e vestiarios, e coincide co recheo feito na década dos 70 e que supuxo a ocupación deses case 14.000 metros cadrados gañados ao mar.
O goberno municipal valora moi favorablemente a resolución e considera que esta decisión representa para o Concello e a súa veciñanza un motivo de ledicia e un paso moi importante cara á consolidación dos Subarreiros como o novo e futuro espazo de lecer de Neda. “É un proxecto fundamental, interxeneracional, no que haberá zonas de ocio para maiores e outras máis enfocadas á mocidade e poboación infantil, explicou o alcalde, Ángel Alvariño Saavedra.

O executivo local estima en arredor de 100.000 euros os cartos necesarios para levar a cabo as obras previstas e ve como necesaria a implicación de outras administracións para garantir a realización dos novos proxectos. O Concello xa dispón dun proxecto elaborado polo servizo técnico para a realización das novas infraestruturas e mesmo tamén da ampliación do parque infantil que xa existe.

O Concello non terá que abonar ningún tipo de canon ao Ministerio pola concesión agora outorgada e dispón de tres meses, prorrogables, para o inicio dos traballos e para a realización dos trámites, licenzas e demais autorizacións.



A ESCOLA INFANTIL OS PELEGRÍNS ARRINCA CUN TOTAL DE 14 ALUMNOS E UNHA XORNADA DE PORTAS ABERTAS CARA AOS PAIS

Neda, 4 de setembro de 2017.- Cunha matrícula de 14 alumnos hoxe abriu as súas portas a primeira escola infantil pública do concello de Neda, “Os Pelegríns”. O inicio do curso arrincaba esta mañá cunha xornada de portas abertas cara aos pais e un periodo de quince días para facilitar a incorporación dos nenos ás aulas cun horario reducido e a distribución dos menores en dous grupos para facilitar a súa adaptación.
O alcalde, Ángel Alvariño Saavedra, acompañado da concelleira de Facenda, Servizos Sociais, Igualdade e Terceira Idade, Ana Rosa Pena Barcia, e do concelleiro de Obras e Servizos, Ángel García Cordero, quixo estar presente no inicio do curso escolar para falar coas persoas que están á fronte do servizo e mesmo tamén con algúns dos pais destes primeiros alumnos. Alomenos durante o tempo que durou a visita dos responsables municipais todos os pequenos pareceron acostumarse ben á nova situación.
Ana Rosa Pena Barcia valorou a entrada en funcionamento da escola infantil Os Pelegríns -“un servizo moi demandado polos pais e nais traballadores con nenos menores de tres anos”, segundo dixo-, por representar un gran logro para un municipio das características de Neda e porque sen dúbida axudará a fixar poboación, como tamén apuntou o alcalde. Pena Barcia entende ademais que as escolas infantís cumpren un importante papel pedagóxico porque axudan á socialización dos nenos e nenas e promoven a igualdade de xénero, ao tempo que recordou que a matrícula aínda segue aberta. Tamén quixo agradecer expresamente a colaboración do artista local Carlos García que “fixo un precioso mural nunha das paredes exteriores das instalacións, toda unha honra para nós”, segundo sinalou a concelleira.
A escola infantil “Os Pelegríns” ten capacidade para acoller un total de 41 alumnos de cero a tres anos. Está ubicada na zona do Empedrón e xestionada pola empresa Aurola, Pilar y Ana. Ánxela Taboada é a directora do centro, que dispón de tres aulas -de 0 a 1 anos, de 1 a 2 anos e de 2 a 3 anos de idade- comedor, aseos, zonas de xogo e dependencias de tipo administrativo. A Unión Europea, a través da Xunta de Galicia, aportou os 120.000 euros necesarios para la transformación dunha antiga escola unitaria nas actuais instalacións. Para súa banda, o Concello asumiu integramente a dotación do centro, desde cociña e aseos ata os xoguetes e mobiliario e recentemente aínda habilitou un espazo cuberto para que os pais poidan deixar as cadeiras infantís.



UNHA POUCA DE CHOIVA NON FOI QUEN DE ARRUINAR A XXIX FESTA DO PAN DE NEDA

Neda, 3 de setembro de 2017. Unha pouca de choiva non foi quen de arruinar a celebración da Festa do Pan de Neda, que hoxe volvía reunir a centos de persoas no paseo marítimo, entre as que se atopaban a vicepresidenta da Deputación da Coruña, Goretti Sanmartín, e os alcaldes de San Sadurniño e A Capela, Secundino García e Manuel Meizoso, ademais do equipo de goberno de Neda.
A festa por excelencia do municipio daba comezo a primeiras horas da mañá coa apertura dos máis de trinta postos de venda de artesanía e alimentación situados nas inmediacións do albergue de peregrinos. Non moi lonxe desde lugar tamén se atopaba o escenario sobre o que o día anterior actuaron Sanjurjo&Dopico e SES e que  a partir das 12.30 horas, foi o epicentro da festa co pregón protagonizado polo grupo de teatro A Panadaría, o acto de entrega dos premios da Ruta do Pincho e as verbas de agradecemento tanto por parte do alcalde, Ángel Alvariño Saavedra, como da concelleira de Cultura, Cristina Bouza Bellón, aos asistentes.
En ambas estas dúas intervencións, os representantes do equipo do goberno de Neda quixeron deixar constancia da importancia de contar con respaldo das institucións, da colaboración das persoas e do interese do público en xeral para poder levar a cabo con éxito unha nova edición da Festa do Pan, a número vintenove. Tamén fixeron unha mención especial a aquelas persoas que foron quen de garantir a continuidade da festa que desde o ano 2013 está considerada Festa de Interese Turístico de Galicia.
A Panadaría tamén pasou polo escenario da Festa do Pan para se rir do mal tempo -a choiva facía acto de presenza no momento do pregón-, para facer referencias constantes ás características naturais e patrimoniais do municipio e para poñer a proba o padal do alcalde á hora de elexir entre tres anacos de pan o feito en Neda. A Panadaría tamén deu a súa particular visión do desfeita da Armada Invencible - “non foi o pan, que foi a auga ardente”, segundo dicía a canción interpretada pola compañía - e chegou a recoñecer a Neda como “a capital do trigo”.
A continuación foron pasando polo escenario os responsables dos establecimentos gañadores da Ruta do Pincho -O Fumazo (premio ao pincho máis sabedeiro), Albarón (orixinalidade) e Chámame como Queiras (presentación) - e foron elexidos ao azar os premiados de 100 en euros en metálico entre as 115 persoas que completaron a cartilla. Son María del Pilar Veloso, María Luisa Meizoso e Paula Rodríguez Martínez.
 



O MESÓN O FUMAZO, O BAR ALBARÓN E A CAFETERÍA CHÁMAME COMO QUEIRAS SON OS GAÑADORES DA SEGUNDA EDICIÓN DA RUTA DO PINCHO

Neda, 2 de setembro de 2017. O segundo concurso da Ruta do Pincho organizado polo Concello de Neda como anticipo da Festa do Pan que comeza hoxe non puido deixar mellor sabor de boca entre os convocantes e os establecementos de hostalería participantes e, de maneira máis especial, entre os locais gañadores do certame. O mesón O Fumazo (“Brocheta ibérica antiga con aroma de mencía e tartaleta de arándanos”) conseguiu o premio ao pincho máis sabedeiro, o bar Albarón (“Picoto”) foi premiado pola orixinalidade do prato e a cafetería Chámame como Queiras (“Salpicopi”) pola boa presentación da súa proposta culinaria. Os tres gañadores pasarán mañá domingo polo escenario da XXIX Festa do Pan para recibir o recoñecemento do público e as mencións que o Concello concede aos premiados e que serán entregadas polos seus representantes. Este acto será xusto despois da lectura do pregón, que dará comezo ás 12.30 horas e que estará a cargo da compañía de teatro A Panadaría. O goberno local valora a resposta da xente durante as dúas fins de sema que durou o concurso, así como o número de tapas vendidas e as 115 persoas que completaron a ruta. Os responsables municipais tamén destacan as máis de 4.300 descargas que houbo da app “Quedamosdetapas”, por tratarse da primeira vez que o Concello bota man deste tipo de aplicacións informáticas para facilitar a participación da xente na convocatoria.


<<  Anterior  | 1  | 2  | 3  | 4  | 5  | Seguinte  >>