Novas


DÍA MUNDIAL CONTRA O CANCRO

 Con motivo do Día Mundial contra o Cancro, a fachada da casa consistorial de Neda volveu a iluminarse un ano máis de cor verde para dar visibilidade a esta doenza. Unha iniciativa que responde á chamada da Asociación Española contra el Cáncer (AECC) e coa que, este ano, reivindicamos a necesidade dun gran Acordo Contra o Cancro para que calquer persoa teña as mesmas posibilidades para previr o cancro, vivir con el e acceder aos resultados da súa investigación.



O Concello de Neda abre a inscrición nun obradoiro gratuíto de narrativas dixitais

 O Concello de Neda vén de abrir a inscrición nun obradoiro en liña de narrativas dixitais, no que as persoas participantes poderán coñecer as claves das chamadas “narrativas dixitais” para, ao mesmo tempo, crear con elas o seu propio discurso. Constará de dúas sesións, o 5 e o 26 de marzo, ás 18,30 horas, cunha duración aproximada dunha hora por xornada.

Este obradoiro está especialmente pensado para persoas vinculadas ao tecido asociativo de Neda, e tamén do veciño Narón, interesadas en utilizar as narrativas dixitais como ferramenta para a divulgación, a sensibilización ou o activismo, en diferentes ámbitos: a promoción do patrimonio (material ou inmaterial), lingua, medioambiente, inclusión, diversidades, etc,... As persoas interesadas en participar deben cumprimentar este formulario antes do 12 de febreiro: https://forms.gle/CqJuGYURUCf9WnF58 .

O taller forma parte do proxecto Laboratorios Dixitais de Creación Dixital, que desenvolve obradoiros relacionados co ámbito dixital en varios lugares da provincia. Esta iniciativa, que conta con financiamento da Deputación da Coruña e a colaboración da área de Cultura do Concello, é de carácter gratuíto.
 
O obradoiro ten un enfoque práctico e combinará pequenos contidos teóricos, cun acompañamento e titorización no desenvolvemento dun proxecto grupal. Ten un máximo de 30 prazas que se adxudicarán por un criterio estritamente cronolóxico. 


Os concellos da Mancomunidade acordan medidas sobre o uso dos parques infantís ante o empeoramento da pandemia

 Os alcaldes dos nove municipios que forman parte da Mancomunidade de Concellos da Comarca de Ferrol acordaron onte coordinar medidas respecto dos parques infantís no marco das restricións debidas á covid-19 e tendo en conta a gravidade da situación. Os rexedores analizaron conxuntamente as opcións en relación ao uso destes espazos dedicados ao lecer dos nenos e  finalmente decantáronse maioritariamente por pechalos, de xeito que en Ares, Cabanas, Cedeira, Fene, Ferrol, Narón, Neda e Valdoviño non será posible acceder a eles.

Ao estudar o asunto tívose en conta que, se ben é importante que os concellos da Mancomunidade coordinen as súas decisións, cada un pode presentar características e situacións distintas e necesitar adoitar medidas diferentes, como nesta ocasión foi o caso de Mugardos, un dos municipios de menor extensión da provincia, polo que nese concello os parques infantís permanecerán abertos.

A orde da Xunta de Galicia do pasado martes establece que os parques infantís poderán estar abertos ao público sempre que neles se respecte unha capacidade máxima estimada dunha persoa por cada catro metros cadrados da área total do recinto e que deberán aplicarse as medidas de hixiene e prevención establecidas, especialmente no que se refire á limpeza e desinfección diarias dos xogos e ou outro mobiliario urbano de uso compartido. Pero nesta ocasión os alcaldes tamén tiveron en conta a gravidade da situación que soporta a área sanitaria de Ferrol durante as últimas semanas e a necesidade perentoria de interromper a cadea de contaxios


O Concello de Neda investirá máis de 100.000 euros no acondicionamento dos camiños de Rabadeña-Fábrica do Monte e do Vilar

 O Concello de Neda destinará os fondos do Plan Único de Concellos da Deputación provincial da Coruña ao acondicionamento dos camiños do Vilar e de Rabadeña-Fábrica do Monte, nos que investirá algo máis de 100.000 euros. Así o acordou a corporación na sesión plenaria celebrada no día de onte. Na mesma, tamén se deu luz verde aos investimentos con cargo ao POS Adicional, que se reservan para a mellora de viais e equipamentos deportivos e culturais.

Máis polo miúdo, o Concello de Neda investirá este ano 100.985,14 euros nas obras de aglomerado do camiño que une a Fábrica do Monte con Rabadeña e no camiño do Vilar (en Casadelos). Dous viais moi deteriorados polo paso do tempo e o intenso tráfico que soportan, así como polos efectos do tránsito continuo de vehículos adicados ao transporte de madeira no primeiro caso. O obxectivo é acondicionar o firme e mellorar a mobilidade e seguridade vial de conductores e peóns.

POS ADICIONAL
Así mesmo, e con cargo ao POS Adicional, o Concello plantea a pavimentación dos camiños do Empedrón (30.393,18 euros), Murallón (38.739,52 euros), Ardá (46.041,71 euros), Chisqueira-Galanos (36.949,48 euros) e Alcallás-Cruz do Pouso (62.094,64 euros). Tamén proxecta traballos no campo de fútbol de San Isidro por valor de 61.356,44 euros. En concreto, a reforma da zona de gradas para ampliar a cuberta e protexer ao público da choiva.
 
E, finalmente, as actuacións previstas completaríanse coa renovación da cuberta e a substitución das ventás do inmoble da Casa da Cultura. Dúas intervencións de eficiencia enerxética que suman algo máis de 126.000 euros.


Novas restricións fronte á covid-19 a partir deste mércores

 A Xunta de Galicia vén de avanzar novas restriccións para frear a expansión da covid-19, sendo 43 o número de casos diagnosticados a día de hoxe no noso concello. Entre as principais: 

-A mobilidade segue a estar reducida aos límites do concello de Neda (só se poderá saír ou entrar por razóns xustificadas e acreditadas como motivos laborais, sanitarios, educativos…)
-Quedan prohibidas as reunións de non convivintes
-O toque de queda mantense nas 22 horas
-A hostalería pecha as súas portas e só se permite o servizo de recollida de comida e a domicilio
-O comercio esencial poderá abrir ata as 21,30 horas e o non esencial, ata as 18 horas
-A actividade deportiva queda limitada á práctica individual, ao aire libre e con mascarilla
Entrarán en vigor este mércores

<<  Anterior  | 1  | 2  | 3  | 4  | 5  | Seguinte  >>