Novas


Novos horarios do transporte público nas fins de semana e festivos

 Compartimos os novos horarios do servizo de transporte público que entran en vigor este sábado para as fins de semana e días festivos. Alsa, empresa concesionaria do servizo, sinala que a adaptación dos horarios ás restricións actuais motivadas pola covid-19 dan cumprimento á resolución da Dirección Xeral de Mobilidade da Xunta de Galicia atendendo ás ocupacións reais das liñas, mantendo sempre a lo menos un traxecto de ida e volta en todas elas, e poñendo especial coidado na atención aos centros hospitalarios e horarios dos traballadores e traballadoras destes.  



O Concello de Neda suma un novo colector no Puntal para a reciclaxe de aceites usados de cociña

O Concello de Neda vén de instalar un novo colector para a recollida de aceites usados de cociña. Ubícase no lugar da Silva, no Puntal, e con el a rede deste tipo de infraestruturas elévase a 12. Dende a Administración local lémbrase que os emprazamentos son os seguintes: Mourela Baixa (inmediacións do transformador de Unión Fenosa); Muchiqueira (beirarrúa da farmacia); avenida de Xuvia; Santa María (nas inmediacións do adro); avenida de Alxeciras (illa de colectores diagonal á consistorial e fronte ao Eroski); lugar de Forxá (nas inmediacións do lavadoiro e a fonte); Puntal (avenida Médico Cebreiro); Anca (xunto á igrexa); Viladonelle (na contorna da asociación de veciños O Castro); O Roxal (fronte ao polideportivo), e San Nicolás (inmediacións da praza reitoral).

 
Neste sentido, a Administración local sinala que estes colectores están destinados á recollida de aceite vexetal sobrante de asados, fritos, alimentos enlatados ou graxas, entre outros. Uns residuos que, coa colaboración da veciñanza, poden obter unha segunda vida, xa que con el pódese facer biocombustibles para motores diésel, abonos, ceras, barnices, deterxentes, locións, xabróns, pinturas…


O Concello de Neda convida á veciñanza a celebrar o Entroido nas redes sociais municipais

 O Concello de Neda troca este ano o formato de celebración do Entroido e convida á veciñanza a disfrazarse e compartir as súas imaxes a través das redes sociais municipais, mantendo así unha tradición de gran arraigo no municipio. Ademais, e para animar a participación, todas as persoas que se sumen á iniciativa recibirán un pequeno agasallo e entrarán a formar parte dun sorteo de cinco cestas con produtos típicos destas datas.

Así, haberá varias categorías: individual para todas as idades e familiar (persoas convivintes). Nun e noutro caso, deberán enviar unha fotografía ao número 650 48 45 21 ou correo cultura@neda.gal entre o venres 12 de febreiro e o mércores 17 do mesmo mes, sinalando nome e apelidos, DNI, idade e enderezo.

Todas as fotografías serán publicadas nas redes sociais do Concello nas datas sinaladas anteriormente, e é necesario presentar, vía mail ou whatsapp, o documento cuberto de autorización de uso de datos e imaxes por parte do Concello, así como unha autorización para que os menores podan participar no sorteo e usar os seus nomes e imaxes. Esta pode descargarse da web www.neda.es ou recoller na Casa da Cultura con cita previa no 981 39 02 33.
 
Desta maneira, todos os participantes recibirán no seu enderezo un cartucho de diferentes lambonadas segundo as súas idades. E, entre todos, o xoves 18 de febreiro sortearanse 5 cestas con produtos típicos do Entroido valoradas en 100 euros cada unha.


O Concello reforza o gasto social sumando unha partida de 85.000 euros para cubrir as necesidades das familias afectadas pola crise económica da covid

 O Concello de Neda aumentará significativamente o gasto social este ano para garantir a protección dos veciños e veciñas máis afectados pola crise económica derivada da covid-19. Así, elevará en 85.932,62 euros a partida dos Servizos Sociais municipais. Para iso, destinará unha achega superior aos 79.000 euros procedente do POS Adicional Social da Deputación e redirixirá o destino doutros 6.000 euros do orzamento municipal. Con estes fondos cubriranse as principais necesidades das familias nedenses a través das axudas de emerxencia social; permitirán tamén eximilas de tributos e tasas para aliviar a súa presión fiscal e procederase á compra de EPIS e menciñas. A medida foi aprobada en pleno cos votos favorables de PSOE, PP e BNG e a abstención de Moveneda.

En concreto, o Concello aumentará a partida destinada a axudas de emerxencia social en 30.000 euros para a adquisición especialmente de alimentos destinados ás familias en risco de exclusión social.

Idéntico incremento, de 30.000 euros, para cubrir cuotas de hipoteca, recibos de aluguer, da luz, adquisición de electrodomésticos de primeira necesidade ou reformas básicas de vivenda fundamentais para garantir a habitabilidade.
 
Outros 10.000 euros permitirán eximir a veciños e veciñas en situación de vulnerabilidade do pago de tasas municipais como o recibo da auga e da recollida do lixo.
 
Así mesmo, 6.000 euros destinaranse á adquisición de EPIS e ao financiamento de gastos farmacéuticos para aqueles veciños e veciñas sen recursos.
 
E, finalmente, o Concello reserva unha partida cercana aos 10.000 euros para a contratación dun/ha traballador/a social a media xornada, durante 6 meses, para atender o volumen de traballo e as demandas da veciñanza no departamento municipal de Servizos Sociais, atendido hoxe en día por unha traballadora social.
 
En definitiva, fondos fundamentais para cubrir necesidades básicas nesta situación de pandemia que estamos a vivir e que está afectando duramente a moitos veciños e veciñas do noso municipio.


Neda aumenta nun 50% a reciclaxe de papel e cartón nos dous últimos anos

 Neda reciclou en 2020 máis de 7 toneladas de papel e de cartón: 70.140 quilogramos. Isto é, cada veciño e veciña depositou no colector azul unha media de 13,89 kgs. A cifra supón un incremento da reciclaxe dun 34,5% en relación ao 2019 (cando se reciclaron 52.142 kgs). Un aumento significativo que chega ao 49,2% comparando as cifras coas de 2018 (47.000 kgs reciclados).

Nesta liña, o Concello de Neda quere agradecer a implicación da veciñanza nesta misión común, fundamental para alcanzar estes rexistros. Ademais, aumentando a reciclaxe de papel e cartón redúcese a porcentaxe de impropios que van ao colector e, por tanto, desvíase o seu destino habitual a Sogama, rebaixando así a factura que paga o Concello por este concepto.

Non só iso, a nova adxudicación do servizo de recollida a Ambigal permitiu tamén rebaixar a factura mensual que abonaba a Administración local por este servizo, dende os 900 euros ao mes ata os 450 euros de media. En todo caso, o Concello continuará facilitando os medios necesarios á veciñanza para seguir esta liña ascendente e xa avanza a próxima instalación de novos colectores azuis no marco do contrato subscrito.

<<  Anterior  | 1  | 2  | 3  | 4  | 5  | Seguinte  >>