Novas


O profesor Lois Anxo Rodríguez Calvo presenta este venres a guía “O río Belelle ao natural”

O profesor Lois Anxo Rodríguez presentará este venres ás 19 horas na Casa da Cultura de Neda a guía “O río Belelle ao natural”. A publicación, editada polo Concello de Neda, está dirixida a todos aqueles que desexen coñecer, dende un punto de vista práctico, a contorna natural do río Belelle. Pero non se trata dunha guía descritiva clásica, senón que nela se plantea o coñecemento activo do ecosistema do río e o seu entorno a través da realización de experiencias e actividades sinxelas e adaptadas a todas as idades. Ao mesmo tempo, a publicación pretende axudar a desfrutar desta contorna rica e natural “ollando á Natureza” doutro xeito.

 
O acto, co que o Concello se adianta unha xornada á conmemoración do Día Mundial do Medio Ambiente, contará con aforo limitado, polo que as persoas interesadas en tomar parte deben anotarse previamente chamando ao 981 39 02 33 en horario de Biblioteca (de 10 a 14 h e de 16 a 20 horas).


Extraídos os números gañadores da campaña comercial “Grazas por elixirnos”

 A campaña “Grazas por elixirnos”, a través da que o Concello premiará a aquelas persoas que apostan polos negocios de Neda, xa ten gañadores. A Casa consistorial acollía este mediodía o sorteo no que se elixiron os seus boletos premiados.

As concelleiras de Turismo e Comercio, e máis a de Cultura, Soraya Fernández e Verónica Vigo respectivamente, foron as encargadas, en presenza do secretario municipal, de extraer os números das papeletas gañadoras de entre as máis de 15.000 que repartiron os preto de 80 tendas, comercios e despachos profesionais da localidade nos últimos días.
 
Resultaron agraciados con tres cestas de produtos do comercio local os números: 14033 e 14092 (entregados no Café bar Albarón) e o 2625, que foi parar á clientela da Farmacia Uriarte. Ademais, correspondeulles ceas/comidas para dous nos establecementos de hostalería de Neda que elixan a quen teña no seu poder os boletos cos números 2411 (entregado na Floristería Peonía), 2522 (repartido polo Estanco de Xubia) e 13643 (entregado na Estación de servizo Cao Motor).
 
As persoas posuidoras das papeletas agraciadas deben comunicalo no teléfono 619736620 ata 0 5 de xuño. No caso de que non aparezan os gañadores, realizarase un novo sorteo. 


A unidade móbil de doazón de sangue trasládase este martes a Neda

Unha unidade móbil da Axencia de Doazón de Sangue trasladarase este martes 1 de xuño ao Concello de Neda. Permanecerá diante da Casa da Cultura de 9,30 a 14,30 horas e de 16 a 21 horas.

Así mesmo, aquelas persoas que vaian doar aconséllase que soliciten cita previa chamando ao teléfono gratuíto 900 100 828.


A campaña de trampeo contra a velutina que impulsa o Concello chega ao CEIP de Maciñeira

Tralo seu paso polo CEIP San Isidro, esta mañá a campaña de trampeo contra a velutina que impulsa o Concello de Neda chegaba ao CEIP de Maciñeira. Alumnos e alumnas de Educación Primaria participaban nun primeiro momento nun taller teórico sobre o trampeo, guiado por Marcos Pita, do SPEIS de Narón. No mesmo, rapaces e rapazas non só recibiron información sobre o ciclo anual da vespa velutina, senón que aprenderon a realizar as súas propias trampas a partir de botellas de plástico e cordóns. A elas incorporaron o líquido atraínte para iniciar a segunda fase da xornada: a súa colocación en diferentes puntos no exterior do cole.

 
Neste sentido, o alcalde, Ángel Alvariño, e a concelleira de Educación, Ángeles Puentes, acudían ao centro educativo para coñecer a valoración da iniciativa que realizaban docentes e alumnado, e agradecían a súa participación e implicación. 


Narón e Neda acollerán o 5º Festival “Jazz de Ría”

O jazz voltará a unir dous concellos da ría. Tras celebrarse en Mugardos e Ferrol, onde o festival sementou durante catro edicións o amor polo jazz entre o público de todas as idades, o Jazz de Ría viaxa nesta 5ª edición á descuberta de novos espazos nos concellos de Narón e Neda para presentar en breve unha programación que volverá apostar pola calidade, a diversidade, a posta en valor do patrimonio e do territorio, e o apoio incondicional ás propostas artísticas galegas. O venres 13 e o sábado 14 de agosto a ría volverá vibrar co mellor jazz galego.

 
O Festival Jazz de Ría celebrará a súa 5ª edición os días 13 e 14, defendendo unha vez máis a excelente calidade do jazz galego e o valor do territorio como estratexia para convertir á comarca de Ferrol nun lugar de referencia cultural e turística. Este ano o festival segue percorrendo a ría na procura de novos espazos patrimoniais para descubrir e poñer en valor a través de experiencias musicais arredor do jazz que, como xa se demostrou en Mugardos e Ferrol nas anteriores edicións, son capaces de atraer e interesar ano tras ano ao público adulto, e tamén de crear escola entre os máis novos sementando neles o gusto polo jazz e contribuíndo a crear novos públicos para este xénero que conta con grandes propostas artísticas en Galicia.
 
Neste sentido, o festival seguirá apostando por unha programación de jazz galego e de vangarda, que será desvelada en breve e que unha vez máis vai poñer a Ferrolterra como punto de referencia dentro do circuito de festivais de jazz da península. En só catro edicións o Festival Jazz de Ría ampliou notablemente o seu público e a súa repercusión mediática cunha proposta singular en canto a espazos e músicas, que foi nomeado na categoría de Mellor Festival na edición 2018 dos Premios Martín Códax da música.
 
A 5ª edición do Jazz de Ría vai ser posible grazas ao apoio e implicación do Padroado da Cultura de Narón, o Concello de Narón e o Concello de Neda. As dúas administracións locais manifestaron a súa vontade de consolidar o festival e convertelo nunha cita musical de referencia, onde poidan participar todos os concellos da ría co obxectivo de crear espazos e proxectos culturais que contribúan a fomentar a colaboración entre concellos para facer de Ferrolterra un polo cultural diferenciado.

<<  Anterior  | 1  | 2  | 3  | 4  | 5  | Seguinte  >>