Novas


Néboa abre a inscrición no seu Curso de Monitor de Actividades de Tempo Libre

 A Escola de Tempo Libre Néboa organiza un Curso de Monitor de Actividades de Tempo Libre homologado pola Dirección Xeral de Xuventude. Un título que capacita a aqueles que o superen para a realización de actividades socio-culturais e recreativas, tanto en tempo libre urbano como na natureza. A inscrición está aberta e debe formalizarse a través dos teléfonos 669 111 183 ou 646 156 421, de luns a venres e en horario de tarde.

 
Esta acción formativa arrancará no mes de marzo e consta de 2 fases: teórica-práctica cunha duración de 200 horas lectivas, dividida á súa vez nunha parte online e outra presencial, sempre que as circunstancias o permitan. Esta última realizarase en sucesivas fins de semana, con clases os sábados de 9 a 14 h e de 16 a 20 h, e os domingos de 9 a 14 h (como norma xeral).
 
ESCENARIOS
Ademais, unha das materias, aire libre, desenvolverase na área recreativa de Vilarbó (As Pontes) posto que nel se van impartir coñecementos de orientación, montaxe de tendas... e alí será onde os/as alumnos/as do curso realicen o período de prácticas. Complementariamente, a materia de educación ambiental, se o tempo o permite, transcurrirá principalmente ao aire libre polos espazos naturais do Concello de Neda.

O lugar onde serán impartidas o resto das clases presenciais será concretado iniciado o curso, pero sempre no Concello de Neda.

 


Comeza a vacinación contra a covid entre as auxiliares do Servizo de Axuda no Fogar de Neda

 As traballadoras do Servizo de Axuda no Fogar de Neda están a recibir estes días a primeira dose da vacina contra o coronavirus. Unha medida que chega despois de que as auxiliares se sometesen a pasada fin de semana a un cribado realizado ao confirmarse 3 casos positivos na plantilla, integrada por 50 profesionais. Sen embargo, os resultados destas últimas probas foron todas negativas. Ademais, e para maior seguridade, o cribado estendeuse aos usuarios e usuarias do servizo de axuda no fogar co mesmo resultado: cero casos positivos a día de hoxe.

O Concello de Neda, aínda que coa necesaria prudencia, valora positivamente estes datos, e chama á veciñanza a non baixar a garda no municipio, con 19 casos confirmados a día de hoxe.

A vacinación das traballadoras do SAF supón unha medida de especial importancia non só para a protección deste colectivo, que traballa día a día en primeira liña, senón tamén para protexer a maiores e dependentes, especialmente vulnerables fronte á covid. De feito, xa nos primeiros meses da pandemia, o Concello de Neda solicitaba por escrito á Xunta de Galicia que equiparase ao persoal deste servizo cos profesionais sanitarios, dotándoos dos mesmos medios de protección para garantir a súa seguridade.


Alerta por temporal

 A Dirección Xeral de Emerxencias e Interior da Xunta vén de activar a alerta laranxa por vento con refachos que poden alcanzar os 100 quilómetros por hora e temporal costeiro dende este mediodía.

 
Por iso, pídese máxima precaución e realizar tan só saídas imprescindibles. Dende a Xunta, recórdase á poboación a importancia de retirar os obxectos que poidan caer á rúa dende os tellados, balcóns e fiestras e evitar pasar preto de edificios en ruínas, en construción, árbores, paneis publicitarios e obxectos susceptibles de desprazarse co vento.


A Biblioteca reabre as súas portas

 O Concello de Neda informa de que a Biblioteca Municipal reabre hoxe as súas portas e recupera así a atención presencial. Iso si, coa limitación de aforo do 30% establecida pola Xunta de Galicia no marco das novas medidas vixentes en relación á covid-19.

O horario de apertura será de 9 a 13 e de 16 a 20 horas de luns a venres, coas correspondentes medidas de prevención para garantir que a Biblioteca sexa un espazo seguro



O Concello de Neda insta á Xunta a manter o programa de apoio no entorno familiar namentras dure a crise da covid-19

 O Concello de Neda vén de remitir un escrito á Consellería de Política Social da Xunta de Galicia no que lle solicita que reconsidere a súa decisión de suspender o Programa Extraordinario de Apoio no Entorno Familiar. Un programa que a Xunta activaba coa declaración do estado de alarma xerado pola covid-19 e ao que poñía fin o pasado 1 de decembro. O seu obxectivo era reforzar a atención de todas as persoas que precisasen axuda pola súa situación de especial vulnerabilidade, e servía de apoio ao Servizo de Axuda no Fogar.

Para o Concello de Neda, esa situación crítica non só non desapareceu senón que se viu incrementada, posto que a comarca está a sufrir unha nova sacudida con maior virulencia que as anteriores, o que obriga a reforzar o nivel asistencial tal e como están a facer as administracións locais e provinciais. Por iso, o Concello pídelle o mesmo esforzo á Xunta.

Así, dende o Concello entédese fundamental manter o citado programa, así como o copago por parte da Administración local, ao que se compromete Neda nuns momentos nos que toda axuda social resulta pouca e irrenunciable. 

<<  Anterior  | 1  | 2  | 3  | 4  | 5  | Seguinte  >>