Novas


I Campeonato de chave Concello de Neda



Presentamos o cartel definitivo do Festival Noite de Bolos, sábado 1 de setembro 2018 no paseo marítimo de xubia a partir das 21.30 h. Rock metal, música balcánica, garaxe, punk. Bandas galegas en galego. Non o perdas!. Iremos informando.



POLÍTICA SOCIAL CONTRIBÚE CON 18.000 EUROS AO EQUIPAMENTO DA ESCOLA INFANTIL “OS PELEGRÍNS”


Neda, 10 de Xullo de 2018.- O Concello de Neda vén de firmar un convenio de colaboración coa Consellería de Política Social para contribuír ao equipamento da escola infantil “Os Pelegríns”, un servizo que entrou en funcionamento hai agora un ano e que o equipo de goberno considera clave para garantir o incremento dunha poboación local. A colaboración autonómica ascende a 18.000 euros.
O acordo foi asinado no transcurso dun acto que tivo lugar onte en Santiago de Compostela e no que estiveron presentes o titular da devandita consellería, José Manuel Rey Varela; o xerente do Consorcio Galego de Servizos de Igualdade e Benestar, Perfecto Rodríguez Muíño, e o alcalde, Ángel Alvariño Saavedra.
No encontro foron abordadas outras cuestións como a participación do Concello de Neda nun plan autonómico polo que as escolas infantís recibirán unha axuda de 7.000 euros por cada unha das aulas que teñan en funcionamento -no caso de Neda serían 14.000 euros- e o compromiso de incrementar o número de usuarios do servizo de asistencia ao fogar, unha prestación social moi necesaria e demandada nun municipio no que viven 1.500 persoas maiores de 65 anos.
O titular da Consellería de Política Social, José Manuel Rey Varela, tamén comprometeuse a estudar a posibilidade de que os maiores de Neda poidan facer uso do centro de día de Caranza, no que a día de hoxe existen 40 prazas vacantes, á espera de que o Concello dispoña do seu, un obxectivo sobre o que xa está a traballar o equipo de goberno.
Pola súa banda, o alcalde valorou a posibilidade de que o Concello participe no servizo “Xantar na casa”, unha iniciativa autonómica dirixida ás persoas maiores que “pode ser de gran interese para as persoas de certas idades, que vivan soas ou que teñan algún tipo de discapacidade”, segundo apuntou Alvariño Saavedra.
CONCELLO
DE NEDA



Convocatoria e bases reguladoras das subvencións municipais a entidades sen fin de lucro durante o exercicio de 2018

ANUNCIO O Pleno este Concello, en sesión celebrada o día 9 de abril do 2018, aprobou os orzamentos e as súas bases de execución para o actual exercicio de 2018. No anexo IV recóllense as BASES REGULADORAS DE CONCESIÓN DE SUBVENCIÓNS MUNICIPAIS A ENTIDADES SEN FIN DE LUCRO. Cumprindo o acordo adoptado pola Xunta de Goberno Local, en sesión celebrada o día 25 do mes actual, fanse públicas estas bases. Consoante co previsto na base 4, das reguladoras da convocatoria, as entidades interesadas poderán solicitar as subvencións no prazo de VINTE DÍAS NATURAIS, contados a partir do seguinte ao da publicación deste anuncio no Boletín Oficial da Provincia da Coruña.

 

Enlace a convocatoria no B.O.P



COSTAS SITÚA A FINAIS DESTE MES A APERTURA AO PÚBLICO DA PASARELA SOBRE O RÍO XUVIA

Neda, 5 de Xullo de 2018. A Demarcación de Costas fixou para os últimos días do presente mes a apertura ao público da pasarela sobre o río Xuvia, unha estrutura que onte recibía a visita dos máximos responsables da Demarcación en Galicia, Rafael Eimil Apenela e Carlos Gil, e dos alcaldes de Neda e Narón, Ángel Alvariño Saavedra e Marián Ferreiro Díaz, respectivamente. Estes dous territorios están unidos por unha plataforma peonil de 90 metros de lonxitude.
Durante o tempo que duraron as obras, máis do previsto inicialmente pola meteorolóxica adversa, tal e como recoñeceu o Xefe da Demarcación de Costas en Galicia, Rafael Eimil, a pasarela foi sometida a un profundo tratamento de conservación e renovación, do que o conselleiro técnico Carlos Gil destacou a aplicación de funxicidas para garantir a conservación da madeira -que tamén se limpou- a utilización de pinturas “grosas para que non haxa que tocarlle ao menos nos próximos cinco anos”, a apertura de furados nas bases dos arcos para evitar a acumulación de auga e a substitución de pasadores dos tirantes que suxeitan a estrutura voada para estabilizala.
A parte máis ornamental da pasarela, os arcos, xa locen desde hai días unha cor vermella que destaca de maneira moi especial sobre “unha paisaxe moi ben conservada”, segundo recoñeceu o propio Rafael Eimil aos rexedores municipais. O responsable de Costas confirmou así mesmo que a instalación dos máis de 150 metros de varanda dará comezo o próximo luns e que a recta final da obra consistirá na colocación e posta en funcionamento do novo sistema de iluminación. Será a base de tecnoloxía LED e dará lugar á colocación dun punto de luz cada cinco metros para alumear a estrutura peonil e outros doce sobre o teito dunha renovada cuberta de zinc que enfocarán directamente aos arcos.
O investimento superou os 196.000 euros e a obra foi executada pola empresa Tragsa, cuxa delegada para a zona da Coruña, Elena Iglesias, tamén estivo presente durante a visita. O alcalde de Neda, Ángel Alvariño Saavedra, destacou a dobre función que cumpre a pasarela, xa que fai posible poder recorrer a pé todo o perímetro da ría, desde Ferrol a Xuvia, pasando por Narón e Fene, ademais de desempeñar unha clara función social. A estrutura é un elemento máis dun espazo de lecer creado entre Neda e Narón na desembocadura do río Xuvia.
Pola súa banda, a alcaldesa de Narón coincidiu con Alvariño Saavedra en sublimar a importancia desta estrutura a nivel de comunicación entre ámbolos dous concellos. Así mesmo, valorou os traballos realizados por Costas e tamén o próximo remate das obras.
A pasarela ten un dobre arco central de 45 metros cada uno. É de madeira laminada sobre un taboleiro formado por un caixón en aceiro de dous metros de anchura e outros 2,5 máis ao aire. Un xogo de amarres e cables laterais dan á infraestrutura unha imaxe de flexión. A pasarela foi inaugurada no 2004 e só catro anos despois afrontou a súa primeira reparación por parte da Demarcación de Costas en Galicia.


<<  Anterior  | 96  | 97  | 98  | 99  | 100  | Seguinte >>