Concello de Neda

 A Mancomunidade de Concellos da Comarca de Ferrol celebrou onte pola mañá unha reunión por videoconferencia. Foi presidida polo presidente e alcalde de Ferrol, Ángel Mato, e contou coa asistencia da totalidade dos representantes municipais que integran este órgano: os alcaldes Julio Iglesias (Ares), Carlos Ladra (Cabanas), Pablo Moreda (Cedeira), Juventino Trigo (Fene), Juan Domingo de Deus (Mugardos), Marián Ferreiro (Narón), Ángel Alvariño (Neda) e Alberto González (Valdoviño) e o segundo representante do Concello de Ferrol no pleno da Mancomunidade, Iván Rivas. Na reunión acordouse que os nove concellos coordinarán a adopción de medidas fiscais en relación co cobramento de taxas e impostos municipais coa finalidade de que se atenda á situación das persoas e actividades económicas máis perxudicadas pola declaración do estado de alarma, de forma adecuada e proporcionada.

Os concellos terán en conta as pautas marcadas polo Estado, A Xunta e a Deputación, e asesoraranse entre si tratando de que as medidas, aínda que se adapten ás circunstancias específicas de cada municipio, sexan coherentes co fin de que non existan disparidades entre concellos e os beneficiarios perciban con claridade o respaldo da Administración. A xuntanza tamén serviu para compartir información sobre a loxística despregada en cada concello en relación co acceso e distribución de material de protección fronte ao coronavirus, atención sociosanitaria, etcétera.

 Conscientes da existencia de fogares que non contan con ordeadores ou conexión a Internet, o Concello de Neda vén de poñer en marcha un servizo pensado para facilitarlles aos estudantes nesta situación a realización das tarefas e deberes escolares que os respectivos centros van poñendo. Trátase de levarllos aos seus domicilios. Para iso, as familias interesadas deben chamar ao Concello: 981 38 00 39 sinalando as direccións web remitidas polos centros educativos para descargar os arquivos. O Concello imprimiraos e levaraos aos domicilios.

Así mesmo, e en caso de que o/a alumno/a teña que remitir os traballos e exercicios aos/as profesores/as, poderá volver a contactar co Concello e este encargarase de facerllos chegar.

 O Concello de Neda celebrará xunto aos máis pequenos da casa os seus cumpreanos nestes momentos de confinamento obrigado polo coronavirus. Para facer desta unha data un pouco máis especial, Protección Civil achegarase ás inmediacións dos seus domicilios desprazando os seus vehículos e facendo soar as sereas para cantarlles o cumpreanos feliz.

Así, as familias interesadas na iniciativa deben chamar ao teléfono 629 224 622 e comunicar o nome do/a neno/a, idade que cumplirá, data e dirección. Así mesmo, e para aqueles/as que cumprisen anos nestes días de confinamento previos o Concello tamén anima ás familias a trasladalo e programar unha data para acudir ao fogar interesado.

 O Concello de Neda vén de intensificar os labores de limpeza e desinfección dos máis de 600 colectores do lixo distribuídos polo municipio como medida de prevención contra o coronavirus. Tras unha primeira limpeza por parte dos operarios, os colectores son introducidos nun “túnel” de lavado onde se lles aplica unha solución de hipoclorito de sodio para a súa desinfección integral. Traballos que o Concello soe realizar periódicamente e que, na situación actual, está a intensificar a través dos servizos de limpeza.

 O Concello de Neda prestará asesoramento a aqueles particulares e empresas do municipio que desexen implantar sistemas de teletraballo. Un servizo completamente gratuíto que se une a outros postos en marcha vencellados ás novas tecnoloxías, como o de resolución de dúbidas no manexo da sede electrónica municipal.

Así, as/os veciñas/os e empresas locais poden solicitar o servizo no correo informatico@neda.gal e o Concello contactará con eles/as para facilitar o asesoramento preciso.